ბიამ, B Talks-ის ფარგლებში, სამშენებლო და დეველოპერული კომპანიების წარმომადგენლებთან მორიგი შეხვედრა - “სამშენებლო და დეველოპერული კომპანიების გამოწვევები და პერსპექტივები” გამართა. სასტუმრო Holiday Inn Tbilisi-ში გამართულ შეხვედრას 100-მდე კომპანიის წარმომადგენელი ესწრებოდა. მოწვეული კომპანიების წარმომადგენლებს წარუდგინეს სამშენებლო ბაზრის დეტალური სტატისტიკა, ინფორმაცია ბაზრის მონიტორინგის და კონტროლის გზებზე და გააცნეს სამშენებლო სექტორის ახალი პერსპექტივები. შეხვედრის ფარგლებში, გაიმართა დისკუსია მოწვეულ სტუმრებთან თბილისის მერიის არქიტექტურის და ზედამხედველობის სამსახურებიდან, სადაც სამშენებლო და დეველოპერულ კომპანიებს საშუალება ჰქონდათ მიეღოთ დეტალური ინფორმაცია მათთვის საინტერესო საკითხებზე. მერიის წარმომადგენლებთან ერთად განიხილეს ისეთი საკითხები, როგორიც არის სამშენებლო რეგულაციები, თბილისის გენერალური გეგმა, უსაფრთხოება, სამშენებლო ნებართვები და ა.შ. B Talks ბიას ახალი მიმართულებაა, რომლის ფარგლებში, სისტემატური შეხვედრები იმართება სხვადასხვა ბიზნეს სექტორების წარმომადგენლებთან. პირველი სეგმენტური შეხვედრა სატრანსპორტო და გადამზიდი კომპანიების წარმომადგენლებთან 2 თებერვალს გაიმართა. შეხვედრას 70-ზე მეტი კომპანიის წარმომადგენელი ესწრებოდა. ბიას მიერ ორგანიზებული შეხვედრები გაგრძელდება და წლის ბოლომდე ბიზნესის ყველა სფეროს მოიცავს.